من جريدة_تميز_TAMAYOZ
في هذا الحوار نلتقي بكاتبة تتحدث عن تجربتها في عالم الكتابة، عن رؤيتها، وتحدياتها، وأفكارها.
الإسم: نعمة أشرف
السن: 19 سنة
الموهبة: الكتابة
المحافظة: الغربية
1. كيف بدأت رحلتك مع الكتابة؟
ج: اولا اتشرفت جدا باللقاء الجميل دا بدأت رحلتي مع الكتابة من وانا طفلة كنت بكتب قصص للاطفال واحيانا بقلد الدرس المستفاد بس كنت شغوفة جدا بالقراءة والأكثر الكتابة
2. ما الذي ألهمك لتكتب أول نص لك؟
ج: لو على اول رواية ف انا كتبتها بسبب حلم حلمته عقلي الباطن كان سبب من الاسباب دي والحمدلله
3. هل يمكنك وصف مصدر إلهامك في الكتابة؟
ج: بصراحة الإلهام بييجيلي من حاجات كتير حواليا ممكن كلمة أسمعها بالصدفة أو مشهد أشوفه في الشارع أو حتى نظرة في عيون حد غريب ساعات حلم صغير بيخليني أكتب قصة كاملة وساعات بيفضل عقلي يشرد في فكرة لحد ما تكتمل لوحدها بحس إن الكتابة بالنسبة ليا هي طريقة أفهم بيها العالم أو أعيد تشكيله بطريقتي دايمًا كان عندي إحساس إن ورا الواقع في عوالم تانية مستنية تتحكي وأنا بكتب عشان أفتح الأبواب دي، وأدخل الناس جواها.
4. ما هو نوع الأدب الذي تفضلينه؟ وهل جربت أنواع أخرى؟
ج: الروائي والنثري اكتر من اي ادب تاني جربت الشعري ولكن ارتحت اكتر في النثر
5. ما أهم التحديات التي واجهتك خلال مشوارك الأدبي؟
ج: بصراحة التحديات كانت كتير وده طبيعي في أي بداية أول حاجة كانت الشك في نفسي دايمًا كان عندي سؤال بيطاردني “هو اللي بكتبه يستاهل يتقري؟
كنت بقعد قدام الصفحة وأكتب وأمسح وأحيانًا أسيب الكتابة بالشهور.
كمان في تحدي الوقت إزاي أوازن بين حياتي اليومية وبين الكتابة اللي محتاجة تركيز وذهن صافي وطبعًا في ناس كتير ممكن تقلل من حلمك أو تشوف إن “الكتابة دي مش شغلانة ومش حاجة كبيرة في الزمن دا ” بس أنا اتعلمت مع الوقت إن الإيمان بالفكرة هو أول خطوة عشان أكمل.
وفيه تحدي تاني مهم إنك تلاقي صوتك الخاص وسط الزحمة إنك تكتبي حاجة ليكي مش شبه حد وتوصلي بيها للقارئ وتحسي إنك سبتّي أثر حتى لو بسيط.
6. كيف كان دعم العائلة والأصدقاء لك؟
ج: اكتر حد كان بيدعمني هي عيلتي وبعديها اصدقائي من ضمن الأسباب اللي خلتني اكمل هي حبهم ودعمهم الكبير ليا وثقتهم فيا وفي قدرتي وموهبتي ف حقيقي ليهم كل الشكر في اللي انا بقيت فيه دلوقتي
7. كيف تتعامل مع النقد؟ وهل أثر في تطورك؟
ج: أنا شايفة إن النقد لو كان بنيّته صادقة ومحترمة بيبقى هدية في الأول طبعًا كنت بزعل خصوصًا لو تعبت جدًا في حاجة وحد شافها بشكل مختلف أو ماعجبتوش بس مع الوقت اتعلمت أفرق بين النقد اللي هدفه البناء وبين اللي هدفه التقليل وخلاص وبالعكس النقد الحقيقي خلاني أركز أكتر على نقاط ضعفي وعدّل حاجات في أسلوبي كنت مش واخدة بالي منها. ف اه هو فعلاً أثّر على تطوري بس للأحسن.
8. هل تعتقدين أن الكتابة وسيلة للتغيير الاجتماعي؟ وكيف؟
ج: ايوا الكتابة ممكن تكون وسيلة قوية جدا في التغيير الاجتماعي أنا مؤمنة إن كل قصة بنكتبها ممكن تخلق وعي ولو بسيط يعني لما تكتبي عن الظلم أو عن شخص مكسور وسط مجتمع قاسي أو عن بنت بتحاول تثبت نفسها في عالم بيرفضها كل ده بيخلي القارئ يحس ويتعاطف ويمكن يغير من تصرفاته أو نظرته التغيير مش دايمًا لازم يكون مباشر أو كبير، بس لو كل كاتب قدر يلمس عقل أو قلب واحد، ده في حد ذاته بداية حقيقية للتغيير.
9. هل تفكرين في إصدار كتاب خاص بك؟ وما موضوعه؟
ج: ايوا باذن الله هصدر كتاب ليا وهيكون روايتي التانية زيراث
10. ما نصيحتك لمن يرغب في دخول عالم الكتابة؟
ج: نصيحتي الأولى اكتب حتى لو حسيت إن اللي بتكتبه مش حلو كفاية البداية دايمًا بتكون صعبة بس الكتابة زي أي حاجة في الدنيا محتاجة تمرين وتكرار
اقرأ كتير واسمع لنفسك أكتر مش لازم تقلّد حد خلي ليك صوتك الخاص حتى لو بسيط في الأول وافتكر دايمًا إن كل كاتب كبير كان في يوم من الأيام مبتدئ
ومرّ بنفس القلق دا
ما تخافش من النقد وخليه أداة تتطور بيها مش حاجة توقفك وافتكر إن الشغف هو اللي هيخليك تكمل مش عدد القراء أو الإعجاب اللي بتاخده
11. ما الرسالة التي تودين توجيهها لقرّاء جريدة_تميز_TAMAYOZ؟
ج: حابة أقول لكل حد بيقرا الكلام دا شكرًا إنكم بتدوا وقت من يومكم تقروا وتعرفوا خبرات جديدة وجود ناس مهتمة بالكلمة والقراءة هو أكبر دعم لأي كاتب
ولو في حد منكم بيحب يكتب أو عنده حلم معين أحب أقول له إن البداية عمرها ما بتكون سهلة بس المهم تكمل مفيش طريق مفروش بالسنتي بس كل خطوة هتقربك حتى لو كانت صغيرة.
أنا لسه بتعلم وبكبر مع كل تجربة،وأتمنى اللي بكتبه يوصلكم بشكل حقيقي ويلمس فيكم حاجة
#المحررة_الصحفية: مريم سيد عاشور
"رحيق"
#المدير_المؤسسة_رحمه_المعتصم_توليب» #جريدة_تميز_TAMAYOZ
#ادعم_موهبتك
تعليقات