معكم المحررة الصحفية: شهد أحمد من جريدة_تميز_TAMAYOZ
في هذا الحوار نلتقي بكاتبة تتحدث عن تجربتها في عالم الكتابة، عن رؤيتها، وتحدياتها، وأفكارها.
الإسم: فاطمة محمد صقر.
السن: 20.
المحافظة: المنوفية
.
الموهبة: كتابة الخواطر.
1. كيف بدأت رحلتك مع الكتابة؟
ج: بدأت رحلتي من الصفر حرفيًا، بدأت بالقراءة ولقيت نفسي جوايا شيء بيحركني للكتابة ومرة في مرة لقتني بدأت اكتب، بدأتها مع نفسي الأول بإقتباسات ولما اتطورت، ولقيت صحابي بيعجبهم اللى بكتبوا شجعوني انشر كتاباتي واظهرها للعلن، ومن هنا خدت الخطوة الأولي لنشر كتاباتي في مؤسسات، وانضميت لكذا مؤسسة وكانوا كلهم أقوي من بعض، وبدأت كتاباتي تتطور أكتر.
2. ما الذي ألهمك لتكتب أول نص لك؟
ج: دافع جوايا اني عايزة اكتب هو اللى حركني اني اكتب، واستغليت دا في إني احكي عن اللى بمر بيه في حياتي.
3. هل يمكنك وصف مصدر إلهامك في الكتابة؟
ج: مصدر الهامي كان الدكتور محمد طه صاحب كتاب لأ بطعم الفلامنكو، لاني بحب علم النفس جدًا وموضوعات التحدث عن الذات وفهمها، كان بجد اكتر حد يحيي الاحساس بإني عايزة اعبر عن اللى جوايا بكل ثقة، ولما كنت بشوف أو اقرأ اقتباسات لدوستويفسكي بقعد اقول هو ازاى قدر بجد يعبر عن اللى جوايا بسهولة كدا، وازاى قدر يختصر كم الوجع دا في جملة مفيدة رغم العبث اللى جوانا فدا كان مصدر إلهام اني ابقى زيهم.
4. ما هو نوع الأدب الذي تفضلينه؟ وهل جربت أنواع أخرى؟
ج: كتابة الخواطر بلاقي نفسي فيها اكتر، جربت اكتب قصص قصيرة وروايات بس انا احسن وافضل في الخواطر.
5. ما أهم التحديات التي واجهتك خلال مشوارك الأدبي؟
ج: هما تلاتة: اول واحد كان فقدان الشغف واليأس اللى بيجي في النص الطريق، والتاني كان إن كتاباتي اتمسحت بسبب الفون فهنا كنت فقدت الشغف في الرجوع نهائيًا للكتابة بس مسبونيش ليأسي ورجعوني ليها ورجعت اقوي فعلًا، التالت كان بقا النقد السلبي اللى قابلته في الوسط كان أكبر عامل هدام قابلته في مشواري.
6. كيف كان دعم العائلة والأصدقاء لك؟
ج: الأصدقاء هما كانوا اكبر داعم ومشجع لطريق نجاحي في الكتابة، بدايةً من أصدقائي المقربين، ومرورًا بأصدقاء الكتابة اللي اتعرفت عليهم وكسبتهم خلال مسيرتي، وختامًا بأصحاب المؤسسات اللى شجعوني علي الاستمرار وطوروا موهبتي، واهلي طبعا بعد ما عرفوا كانوا فخورين بيا جدا.
7. كيف تتعامل مع النقد؟ وهل أثر في تطورك؟
ج: بتعامل معاه علي أنه دافع أساسي لموهبتي لأن طول ما الكاتب لاقي تشجيع علي الكلام اللى بيكتبه ونقد إيجابي موهبته بتتطور وتظهر اكتر كرد فعل إيجابي، فعلا النقد أثر علي تطوري سواء بالسلب أو الايجاب والايجاب اكتر.
8. هل تعتقدين أن الكتابة وسيلة للتغيير الاجتماعي؟ وكيف؟
ج: أيوة طبعًا، الكتابة بتسحب الكاتب من وحدته عن طريق أنه بيفرغ مشاعره وبيعبر عن نفسه بثقة، ودا بيزيد من دافعيته للتقدم، وكمان بيبني علاقات اجتماعية محترمة مع رفقاء القلم ودا حافز مهم ليه.
9. هل تفكرين في إصدار كتاب خاص بك؟ وما موضوعه؟
ج:بفكر فعلا أخد الخطوة للكتاب الفردي، لانه إنجاز كبير هدعمني اكتر، موضوعه هيكون عن علم النفس والشخصيات أو الأمراض النفسية علشان بعشق علم النفس وبحب الكلام فيه.
10. ما نصيحتك لمن يرغب في دخول عالم الكتابة؟
ج: خد الخطوة دي واستمر في طريق نجاحك وتطوير موهبتك واعرف إن اول خطوة دايمًا صعبة بس مشجعه للوصول للقمة، واعرف إن مشوار الكتابة ملهوش خط نهاية لانه بحر كبير اوي كل ما تتعمق فيه هتحس انك لسه عايز مجهود أكبر وأكبر علشان توصل وتعافر في سبيل موهبتك.
11. ما الرسالة التي تودين توجيهها لقرّاء جريدة_تميز_TAMAYOZ؟
ج: الكاتب بيطلب منكم حاجة واحدة بس وهي التشجيع ودا بجد بيفرق معاه منكم جدا، وبيخليه يقف علي أرض ثابتة ويتشجع للخطوة اللى بيأخدها اكتر وبيطور من نفسه علشان يقدملكم احسن ما عنده فكونوا مقيمين عادلين.
#المحررة_الصحفية:
شهد أحمد "أميرة الديجور"
#المدير_المؤسسة_رحمه_المعتصم_توليب» جريدة_تميز_TAMAYOZ
#ادعم_موهبتك
تعليقات